JOSÉ ANTONIO ÁLVAREZ CASTRILLÓN, (ASTURIAS) CRONISTA OFICIAL DE OSCOS (ASTURIAS), SERÁ VOCAL DE XUNTA ASESORA

La Conseyería d’Educación y Cultura quier finar la recuperación toponímica d’Asturies neta llexislatura. Nel 2011 la Xunta de Toponimia, qu’esti día se constituyía, yá comprometiera’l mesmu obxetivu.

Cuatro años después d’aquella promesa del Gobiernu de Cascos son namái que 53 los concejos que tienen la toponimia tradicional aprobada, magar el procesu entamara hai mas d’una década y se recuperaran un total de 16.565 topónimos, sigún informara esti día el gobiernu asturianu.

Fernando Padilla, direutor general de Planificación Llingüística y Normalización, va presidir la nueva etapa de la Xunta de Toponimia, y va tener de vicepresidente al direutor xeneral d’Ordenación del Territoriu y Urbanismu, Juan José Fernández Pereiro. Los vocales de la nueva Xunta asesora van ser Ricardo Suárez Argüelles, direutor xeneral d’Alministración Llocal; Ramón d’Andrés, como representante de la Universidá d’Uviéu; Ana María Cano, representando a l’Academia de la Llingua Asturiana; y José Antonio Álvarez Castrillón, cronista oficial de Oscos, representado al Real Instituto de Estudios Asturianos (RIDEA). El restu los vocales son espertos nomaos pola conseyería, como María Paz Fonticiella, profesora y especialista en toponimia asturiana, y José Alba, profesor titular d’Economía de la Universidá d’Uviéu y espertu en desarrollu sostenible, ocupando la secretaría la xefa del serviciu de Planificación Llingüística y Normalización, Sandra González Tejón.

Fuente: http://asturnews.com/