JOSÉ ANTONIO ALONSO DESTACÓ, “EL PRÓXIMU XUEVES, A LES 20 HORES, EL NOMAMIENTU DEL SOCIU D’HONOR, QU’ANGUAÑO VA RECIBIR, NEL TEATRU FILARMÓNICA, LA CRONISTA OFICIAL D’UVIÉU, CARMEN RUÍZ TILVE

La fiesta de la Balesquida suma sieglos d’hestoria, siendo’l Martes de Campu, el Día del Bollu, el so actu estrella. Los representantes de la Sociedá Protectora de la Balesquida, la vocal Carmen Villaverde; José Antonio Alonso, el so presidente y Javier Gómez, el so vicepresidente, presentaron los festexos esta m en dependencies municipales.

L’actu incluyó amás la presentación del “primer anuariu que faemos nel qu’apaecen les aportaciones d’artistes, socios, articulistes… y que recueye l’actividá de la Sociedá Protectora –con unos 5.000 socios-“, esplicó Villaverde.

Respectu al programa d’anguaño, José Antonio Alonso destacó, “el próximu xueves, a les 20 hores, el Nomamientu del Sociu d’Honor, qu’anguaño va recibir, nel Teatru Filarmónica, la Cronista Oficial d’Uviéu, Carmen Ruíz Tilve, y nel que va actuar el Coru de la Capiya Polifónica Ciudá d’Uviéu”. El sábadu, día 14, nel Paséu de La Rosaleda, de 11 a 14 hores va haber xuegos infantiles. Tampoco nesta edición va faltar la tradicional figura del Heraldu, que la so comitiva ta previstu que sala’l domingu, día 15, dende la plaza de la Catedral pa llegar a la plaza del Conceyu, alredor de la una de la tarde, onde “La Fama” va solicitar el permisu del Consistoriu pa celebrar el Martes de Campu nel Campu San Francisco. “Tamién el domingu, y gracies a la collaboración de la SOF y de la Sección de Ajedrez Real Uviéu, a les 16 hores, nel Palaciu de Congresos recuperaráse’l Tornéu d’Axedrez infantil y xuvenil, al qu’envaloramos que van poder asistir en redol a los 400 participantes”, aseguró’l Presidente de la Sociedá protectora.

El Martes de Campu, especificó Alonso, “va empezar con una alborada musical poles cais de la ciudá y de 9.30 a 13.30 van partise 6.000 bollos y botelles de vinu nel Campu San Francisco. Los que sobren y 200 más se van donar a la Cocina Económica, entidá cola que collaboramos n’otres dómines del añu como en Navidá”. Va Haber mientres la xornada xuegos infantiles nel Parque, Festival de Cantar Asturianu nel Paséu del Bombé y, a les 19 hores, la Tradicional Romería Popular, cola Orquesta “Fábula”

Fuente: http://asturnews.com/