FLORENCIO FRIERA, CRONISTA OFICIAL DE SARIEGO, MIEMBRU DEL RIDEA, Y DE LA REAL ACADEMIA DE LA HISTORIA, DETERMINA NUN ARTÍCULU PUBLICÁU POR «CUBERA» TITULÁU «VALOR HISTÓRICO DE LA TOPONIMIA» LA SOSPECHA, CON FUNDAMENTU DE «QUE QUIENES DECIDIERON LLAMAR VILLAVICIOSA A ESTE CONCEJO

Llegó hasta nós l’antiguu xentiliciu del conceyu mariñán: maliayu o maliayés. Figura igualmente nel nomenclátor local reciente; hai negocios d’hostelería, oficines, etcétera qu’atestigüen la bona salú del vieyu nome. Una pastelería igua unos dulces de frutos secos llamaos «maliayinos». Hasta la escuela pública se sumó al topónimu «CP Maliayo». Esto llevó a que dende dellos sectores villaviciosinos se llegara a plantear la posibilidá de cambiar el nome del conceyu, fai aprosimadamente trece o catorce años, y, sin embargu, nunca llegó a plantease la idea a la Corporación municipal. Cuando fai diez años se reunió la Xunta de Toponimia nel conceyu, ésta entendió que nun procedía la recuperación del topónimu.

Sicasí, pocu se sabe a nivel popular d’esti nome, nin de la so antigüedá, nin del so significáu. «Maliayo» -con pequeñes variantes: «Maliagio, Maliaio, Maiaio, Malaio»-, qu’aparez documentáu nel sieglu IX, ye l’antigua denominación de La Villa o Villaviciosa. Esisten documentos, peñeraos de la manipulación del obispu Pelayo, que citen una «comissio Maliagio» a primeros del X.

Nel sieglu XI esiste na Catedral un documentu que fala de la «terra Maliagio», y nel añu 1115 celébrase un conciliu n’Uviéu que se refier -según indica Manuel Risco en 1793, na so «España sagrada»- a la participación de varios homes «ex territorio Maliani».

Según investigaciones efectuaes por Miguel González Pereda, el conceyu maliayu ocupó aprosimadamente el doble de tarren qu’anguañu, incluyendo Colunga, Caravia, la mitada del conceyu de Ribeseya, parte del de Nava, Cabranes, Sariegu, y parte de Parres. El nome aplicábase al conceyu, inicialmente, ya que nun esistió villa hasta’l 1270, pero al formase, nel tarrén de Güetes -según se cita na carta puebla d’Alfonso X-, un topónimu qu’inda esiste na zona del puente d’entrada a la villa, una pola que s’había de llamar Pola de Maliayo.

Desapareció esti topónimu nel sieglu XIV, una etapa de desarrollu agrariu ensin precedentes que fizo espoxigar enforma la villa. Florencio Friera, cronista oficial de Sariego, miembru del RIDEA, y de la Real Academia de la Historia, determina nun artículu publicáu por «Cubera» tituláu «Valor histórico de la toponimia» la sospecha, con fundamentu de «que quienes decidieron llamar Villaviciosa a este concejo, pensando en que era un nombre más apropiado para identificar un territorio caracterizado por la abundancia de su vegetación, desconocían el por qué otros antepasados suyos y nuestros decidieron conocerlo como Maliayo. A diferencia de este caso, es de notar que han persistido los nombres de los otros concejos que forman la comarca de la sidra», y pon como exemplu los de Colunga y Sariegu.

Sobre l’orixen etimolóxicu de «Maliayo» hai distintes teoríes. Así, Xosé Lluis García Arias plantea que sería un antrotopónimu romanu que derivaría de la fusión de dos nomes llatinos: «Mallus» + «Aius». También plantea la posibilidá d’un nome prerromanu, que proceda d’un raigañu «mal» -que significa «piedra», a la que se-y añadiría «aio»- que figura en munchos antropónimos astures.

Sin embargu, el catedráticu de griegu José Manuel Alonso Moriyón, nun interesante artículo tituláu «La etimología de Maliayo» («Cubera»), considera que nun yera habitual en llatín xuntar dos topónimos nún, y apuesta por una tesis helena.

La raíz «mal» -col signicáu de «monte»-, esiste la isla de Malta, el cau Malea nel Peloponesu; na isla de Creta hai una ciudá que se llama Malia, frente al puertu de Phaistos hai una vaca que se llama Malea, una población ente montañes que se llama Anfimalla y una rexón delimitada per montañes, Malea. Nos Alpes hai altures como Maltein, Malbum; n’Escocia hai una zona de cantiles que llamaron Mala -güei Mull- y los montes superiores a 1.000 metros llámense «Meals».

Pero volviendo a la Península, en Navarra esisten los montes Malgorra y Malcasco. N’Aragón esiste l’apellidu Mayayo -mui estendíu pola zona de Huesca y en Navarra-; xunta Numancia hai un pueblu que llamen Malía. N’Asturies cismontana Tolomeo fala de la ciudá de Malíaca; na Embesnada, ente Tazones y la ría de Llinares, hai una zona que se llama punta y monte de Malverde, en Santamera afáyase El Malaín, que tamién lu hai na parroquia de San Xusto.

En Lluaria la Riega’l Manéu y en Seloriu Manayu -na Rasa-. Nos alredores de Villaviciosa atópase’l monte Grandimáu -cerque de Pandenes, en Cabranes-, que podría referise a les llendes de Maliayo. El topónimu descomponse así: «Grandi», y casi con seguridá «Mao/Malio», que significa «monte grande». En Xixón, nel este de la playa San Llorienzu, esiste Mayán de Tierra, y Mayán de Fuera, les partes altes sin urbanizar llámense Los Mayanes. En Tinéu hai un pueblu que se llama Mayayo.

En definitiva’l magníficu artículu de José Manuel Alonso Moriyón pon sobre la mesa una nueva teoría mui documentada; pero de toes maneres esta cuestión toponímica sigue abierta.

Fuente: http://www.lne.es/ – Lluis Portal