POR JOSÉ ANTONIO FIDALGO SÁNCHEZ, CRONISTA OFICIAL DE COLUNGA (ASTURIAS)

Esti domengu pasáu los artesanos de Colunga diéran-y el so gallardón a José Antonio Fidalgo. Ya yo taba ellí pa velu y abrazalu. Nunca una villa ya un conceyu fixeran más xusticia dando un premiu. Nun soi neutral nesti asuntu, ye verdá. José Antonio, “El Fidalgo” pa aquellos escolinos de La Inmacuda, el colexu de Xixón, yera l’ogru de física. Socarrón, intelixente, yera un gran profesor. Ya yera, cosa difícile, un mayestru. A los mayestros reconóceslos dende la distancia, dende la borrina’l tiempu, lo mesmo que suel pasar colos padres y los güelos, aquellos pesaos de cuando tiníes quince años y a los que recurres cuando tienes cincuenta. Pero, dalgunes vegaes, recurres a ellos en memoria porque yá nun tan nesti mundiu. Por eso ye un placer siguir contando con mayestros como Fidalgo.

“El Fidalgo” ye un home d’esti tiempu y d’otru. Préstai calificase de “cristianu vieyu” y paez un tradicionalista a la vieya usanza. Nun ye un conservador porque la modernidá y la ciencia nun-y permiten ser conservador. Tampoco-y lo diben permitir les sos ñetes. Pero sí que ye un tradicionalista. Y yelo afortunadamente porque, siendo como ye críticu gastronómicu, la tradición faelu aferrase a la identidá asturiana, ensín dar cuartel a platos estravagantes que dalgunos pretenden elevar a símbolos de la cocina nacional. Charrando d’estes coses en Colunga, tomando elli lo que llama “manzaniella adulterao”, esto ye, con unes pingarates d’anís, dime cuenta de que non namái que-y debo los rudimentos de la física, que de muncho me valieron andando un tiempu, por más que sigo siendo bastante inorante. Tamién me identifico con elli en munches coses: ye un docente vocacional, tien un humor negru y rabudu, tóo-y preocupa y, como a Terencio, tolo humano-y ye cercano. Lo que cuasi nunca discutimos ye de política. Neso tenemos un pautu de caballeros, como los dos bonos tradicionalistes que somos, namás que ún ta más a la esquierda que l’otru, ou otru más a la drecha que l’unu. Ye la covalencia de dalgunos elementos químicos, que diría “El Fidalgo”.