EL DOCUMENTAL FOI PRESENTÁU POL CONCEYAL DE CULTURA, ROBERTO SÁNCHEZ RAMOS; LA CRONISTA OFICIAL D’UVIÉU, CARMEN RUIZ TILVE, JORGE CHACHERO Y DAVID ÁLVAREZ LOS ENCARGAOS D’ESTA PRODUCCIÓN

El Teatru Filarmónica foi escenariu’l martes, a les 20 hores, del estrenu del documental “Los últimos dragones d’Uviéu”, sobre les sacaveres d’Uviéu, poblaciones d’estos anfibios que lleven aisllaes dende la fundación de la ciudá, nel Sieglu VIII. El documental foi presentáu pol conceyal de Cultura, Roberto Sánchez Ramos; la cronista oficial d’Uviéu, Carmen Ruiz Tilve, Jorge Chachero y David Álvarez los encargaos d’esta producción.

Con un costu total de 9.960 euros y dos años d’intensu trabayu, indicó’l conceyal de Cultura, “la resultancia ye un interesante trabayu qu’amuesa un Uviéu desconocíu por munchos con un exemplar pedagoxía y profesionalidá. La idea d’esti Conceyu y de les conceyalíes de Cultura y Educación, concretamente, ye trabayar por que esti reportaxe llegue a tolos colexos”.
La cronista oficial d’Uviéu, Carmen Ruiz Tilve felicitó a los autores del documental y recordó cómo na so infancia, “en San Pedro de los Arcos, onde vivía, la mio madre que yera bien valiente sacaba recímanos de ‘sacaveras’ de los regatos”.

Les sacaveres d’Uviéu pertenecen a la subespecie “bernardezi” (Sacavera sacavera bernardezi), nome dáu n’honor del biólogu José Bernárdez, qu’en 1928 recoyó nes turries de l’antigua estación d’El Vascu varios exemplares qu’unvió a Alemaña, onde fueron descritos como una nueva subespecie desconocida hasta entós. Por cuenta de esto, muncha xente, sobremanera nel estranxeru, conoz a estes sacaveres como les Sacaveres d’Uviéu”, anque nun son esclusives de la ciudá, yá que pueden atopase en gran parte de la cornisa cantábrica.

Nel documental tamién s’esponen les resultancies de los trabayos científicos realizaos nos últimos años por científicos de la Universidá d’Uviéu y del Centru de Investigação em Biodiversidade y Recursos Xenéticos de la Universidá de Porto. Pa esti trabayu analizáronse genéticamente amueses procedentes de delles de les 29 poblaciones atopaes dientro de la ciudá.

Fuente: http://asturnews.com/